இதோ மீண்டும் ஒரு வலி சுமந்த வாழ்வில் கரம் கொடுத்து உதவிய உறவுகள். கொடிது வன்னி மக்களின் அவலம், அதனிலும் கொடிது சிறைகளில் வாடும் தமிழ் இளைஞர் துயரம், இதனிலும் கொடிது… முன்னாள் போராளிகளின் இன்னாள் அவலம்…..

 

தாய் மண் மீட்பில் விழுப்புண்பட்ட பல போராளிகளின் துயர் நிறைந்த பட்டியலில் இதுவும் ஒன்று. இதோ ,மீண்டும் ஒரு வலி சுமந்த காவியம்!!! உங்களின் பார்வைக்காக; ஓர் பெண்போராளியின் உள்ளக் குமுறல் .

 

எமது தாய்மண் மீட்புக்கான யுத்தத்தில் எனது கணவரும், நானும் காயமடைந்திருந்தோம.; எனக்கு ஒருகால் மடிக்கமுடியாத நிலை, என் கணவருக்கோ தலையில் பாரிய காயம் ஏற்பட்டு கை கால் இழுத்த நிலையில் தனித்து இயங்க முடியாத நிலை.

 

அவரை பாதுகாப்பதற்கே பெரும் துயரப்பட்டேன்.

 

அவருக்கான ஊட்டச் சத்துணவை பெற்றுக்கொடுக்க என்னால் முடியவில்லை, அதனால் என் கணவரின் உடல்நிலை மென்மேலும் பலவீனமடைந்து வலி ஏற்பட்டது ,இன்றும் தொடர்ந்துகொண்டே இருக்கிறது.

 

கடந்தகாலத்தில் காயங்களுக்குள்ளாகி இருந்தபோது விடுதலைப்புலிகளால் காயமடைந்த போராளிகளுக்கென உருவாக்கப்பட்ட நவம் அறிவுக்கூடத்தில் இருந்தோம்.

அங்கு சிறந்த வகையில் எமக்கான பராமரிப்பு வசதிகள் செய்யப்பட்டிருந்தன. வலிதெரியாமல் வாழ்ந்தோம்.

தலைவரும் வருகை தந்து பார்வையிடுவதோடு மட்டுமன்றி ,எங்கள் குறைநிறைகளையும் கேட்டு அறிவார். இவ்வாறு வாழ்ந்து வந்த நாங்கள் இன்று நாதியற்றவர்களாக வாழ வழியின்றி மிகவும் துயரப்படுகின்றோம்.

 

இந்நிலையில் தான் எம் துயரறிந்து துன்பத்தில் கரம்கொடுக்க ஓடோடி வந்தனர் காலையடி இணையத்தின் உதவும் கரங்கள் அமைப்பினர்.

முல்லைத்தீவு விஸ்வமடு தேராவில் பகுதியில் மூன்று பிள்ளைகளுடன் வசித்து வரும் எங்களின் நிலையை கேட்டறிந்த குழுவினர், அன்றாடம் குடும்பத்தை நடாத்திச்செல்ல தேவையான வாழ்வாதாரத்தினை மேம்படுத்துவதற்காக வேண்டி உதவ முன்வந்தனர்.

 

அதன்படி பால்மாடு ஒன்றையும், மற்றும் என் கணவருக்கான ஊட்டச்சத்து நிறைந்த உணவுகளையும், கட்டில் ஒன்றையும் தந்துதவுமாறு கோரியிருந்தேன்.

அதன்படி காலையடி இணைய உதவும் கரங்கள் ஊடாக பணிப்புலத்தைப் பூர்வீகமாக கொண்ட நோர்வே உறவுகள் மூவர் வழங்கிய 140 000 ஆயிரம் இலங்கை ரூபா நிதியுதவியுடன் எங்களுக்கான உதவிகள் வழங்கிவைக்கப்பட்டன.

அதன்பிரகாரம் முல்லையின் குடும்பத்தினர்க்காக வழங்கப்பட்ட பொருட்களின் செலவு விபரம்.

இவர்களுக்காக ஒதுக்கப்பட்ட மொத்த நிதி 140000

பால்மாடு 96500

தீவனம் கோதுமை தவிடு அரிசித்தவிடு 5985

மாடு கொண்டு சென்றது 1500

கட்டில் முதிரை 18000

கட்டில் ஏற்றியது 1700

ஊட்டச்சத்து பொருட்கள் சஸ்ரோயன் புரோட்டினெக்ஸ் மாமைற் கோழிசூப் 17900

போக்குவரத்து மற்றும் இதர செலவுகள் 3000

மொத்த செலவீனம் 144585

ஆகிய பொருட்கள் 11.11.2017 அன்று வாங்கி வழங்கி வைக்கப்பட்டது. 11.11 அன்றைய தினம் தமிழர்களின் வரலாற்றில் மறக்கமுடியாத நாளும்கூட!. உதவிகளைப் பெற்றுக்கொண்ட முல்லையின் குடும்பத்தினர், உதவி புரிந்த பணிப்புலம் வாழ் உறவுகளுக்கும்,வழி காட்டிய காலையடி இணைய உதவும் கரங்களுக்கும் தம் நெஞ்சார்ந்த நன்றிகளைத் தெரிவித்துக் கொண்டனர்.

நிதியுதவி புரிந்தோரின் விபரங்கள்.

சஷ்சின் சிவரஞ்சன்-ஜேர்மன் 30 000இலங்கை ரூபாய்கள்

சிவபாதம் இராசையா ,  17 500 இலங்கை ரூபாய்கள்

 ஓஸ்லோ வாழ் பணிப்புலத்து மைந்தன் 5000 நோர்வே குரோணர்கள் . இலங்கை பெறுமதியில் 92 500 ரூபாய்கள்